Viðfangsefni:
Þegar tennur slitna og slit nær í gegnum glerunginn þá verður tannbeinið bert. Tannbeinið tekur í sig lit og slitnar hraðar en glerungurinn.

Meðferð:
Viðbótum var bætt neðan á tennur til að hylja tannbein og koma í veg fyrir frekara slit á tönninni .Viðbæturnar eru settar án þess að taka af eigin tönn, er meðferðin fyrst og fremst hugsuð sem forvarnarmeðferð en að sjálsögðu er útlitslegur ávinningur mikill. Framtíðar meðferð er svo að viðhalda þessari stærð tanna því slit heldur áfram.

Viðfangsefni:
Bros okkar samanstendur af tönnum, tannholdi og vörum. Það truflar suma að sýna mikið tannhold í brosinu en nokkrar ástæður geta verið fyrir gómbrosi.

Meðferð: 
Í þessu tilviki huldi tannholdið of stóran hluta af krónu tannarinnar. Þegar það var fjarlægt kom krónan betur í ljós. Í brosinu sést þá meira af tönnum og minna af tannholdi.

Viðfangsefni:
Hvernig við sjáum liti og form er upplifun, stundum þarf ekki að breyta miklu til að upplifunin verði önnur.

Meðferð:
Í þessu tilviki voru kantar neðri góms tanna lagaðir og upplifunin af skekkjunni minnkaði. Bitálag er mikið á þessu svæði og viðhald á þessari meðferð getur verið töluvert. 

Viðfangsefni:
Þeir sem eru með mikið slitnar tennur hafa oft tapað bithæð, þá þarf að hækka bitið svo hægt sé að endurheimta stærð framtanna.

Meðferð:
Hér var bitið hækkað með því að endurnýja fyllingar á jaxlasvæði og tannlitað fyllingarefni notað til að byggja upp framtennur. Þessi meðferð var valin fram yfir aðrar svo ekki þyrfti að fjarlægja frekari tannvef af illa slitnum tönnum.

Notast var við tannlitað fyllingarefni umfram postulín því viðkomandi var í áhættu með brot. Auðveldara og ódýrara er að viðhalda þeirri meðferð.

Viðfangsefni:
Þegar tennur okkar fara að eldast myndast sprungur í glerungnum og geta þær tekið lit.

Meðferð:
Þessum lit er nánast ómögulegt að ná burt með lýsingu. Því verðum við að hreinsa litinn upp með verkfærum og bæta sprunguna með tannlituðu fyllingarefni eins og gert var í þessu tilviki.

Viðfangsefni:
Oft er besta meðferðin minnsta meðferðin, það er ekkert betra en eigin tönn. En stundum verður maður að ganga lengra ef fullnægjandi árangur næst ekki með einfaldari lausnum.

Meðferð:
Í þessu tilviki voru tennur krýndar, var það talin besta og varanlegasta meðferðin fyrir þennan einstakling.

Viðfangsefni:
Margt hefur breyst í efnisvali á síðustu 20 árum og gamlar krónur geta verið mjög áberandi.

 Meðferð:
Í þessu tilviki var gömul króna endurnýjuð og skiptir efnisval öllu máli.

Viðfangsefni:
Margir eru með eina dökka tönn og er algeng ástæða sú að búið er að rótfylla viðkomandi tönn með þeim afleiðingum að tönnin dökknar. Stundum er hægt að ná góðum árangri með því að lýsa þessar tennur en oft þarf frekari meðferð. 

Meðferð:
Hér var um rótfyllta tönn að ræða og var postulínsskel sett framan á dökku tönnina sem viðbót. Í sumum tilvikum er þetta besta leiðin til að fá góðan og stöðugan lit.

Viðfangsefni:
Með aldrinum slitna tennur, þær dökkna, fá almenna eyðingu, bein rýrnar og tannhold hörfar. Tennurnar fá almenna eyðingu þannig að glerungur þynnist og tónusinn í vörinni minnkar. Við sýnum minna af efri góms tönnum og meira af neðri góms tönnum með aldrinum.

Við reynum að vinna á móti þessari þróun.

Meðferð:
Hér voru notaðar postulínsskeljar til að yngja útlit tanna. Postulínsskeljar eru dýrari en skeljar úr tannlituðu fyllingarefni en endingin er töluvert lengri. Eiginleikar postulíns eru slíkir að minna fellur á það en eigin tennur og tannlitað fyllingarefni, þ.a.l. varðveitist litur þess mjög vel. 

Viðfangsefni:
Lítil atriði geta breytt miklu, stundum þarf bara litla breytingu til að breyta miklu.

Meðferð:
Hér var bili lokað með tannlituðu fyllingarefni og tók meðferðin um 40 mín.
Ódýr og einföld meðferð sem getur oft skilað miklu fyrir viðkomandi.

Viðfangsefni:
Bil milli tanna geta stundum truflað fólk.

Meðferð:
Í þessu tilviki voru mið-framtennur færðar saman og hliðartennur stækkaðar með viðbótum úr tannlituðu fyllingarefni. Til þess að halda í raunveruleikann þá skiptir hlutfall framtannanna lykilmáli.

Viðfangsefni / vandamál:
Lágt sýrustig í munninum í langan tíma veldur glerungseyðingu. Eyðingin getur  m.a verið vegna súrra drykkja, gosdrykkja eða bakflæðis eins og hér. Tennurnar höfðu leyst upp og bithæð minnkað.

Meðferð:
Meðferðin hér fólst í því að byggja allar tennur upp og hylja tannbeinið með tannlituðu fyllingarefni.  Fyllingarefnið hefur betra viðnám gegn sýrunni og leysist þ.a.l. ekki upp líkt og tönnin.

Markmið meðferðar:
Bæta útlit, endurheimta bithæð og fá efni yfir tennur sem hefur betra viðnám gegn sýru.

Viðfangsefni:
Þegar tennur eldast geta þær slitnað mishratt eftir bitmynstri, með þeim afleiðingum að tennur verða missíðar.  Þetta er sérstaklega áberandi ef um mið-framtennur er að ræða.

Meðferð:
Þessi meðferð fólst í viðbótum úr tannlituðu fyllingarefni sem bætt var neðan á tennurnar og sídd þeirra jöfnuð. Tennur voru líka breikkaðar til að loka bilinu í miðjunni. Þetta gefur heillegra og yngra bros. Eitt af hlutverkum viðbótanna er að verja tennurnar fyrir frekara sliti. 

Viðhald:
Viðbæturnar koma svo til með að slitna við notkun líkt og eigin tennur gerðu en þá er meðferðin endurtekin. 

Viðfangsefni:
Þegar tennur eru orðnar mjög mislitar vegna mismunandi fyllingarefna og littöku fæst oft ekki fallegt útlit nema með skeljum eða krónum. 

Meðferð: 
Hér var ákveðið að gera skeljar úr tannlituðu fyllingarefni til að bæta útlit, spara tannvef og kostnað. Hér er ekkert tekið af eigin tönn einingis bætt við, þannig reynum við að varðveita sem mest af eigin tönn.

Viðhald:
Viðhald á skeljum úr tannlituðu fyllingarefni er auðvelt en áætlaður endingartími á þeim er ekki eins langur og á postulínsskeljunum en þær eru mun ódýrari og meðferðin tekur styttri tíma. 

Viðfangsefni:
Oft er hægt að gera einfaldar aðgerðir til að láta bros líta betur út án þess að ganga alla leið þegar það er ekki hægt. Hér voru krónurnar mis háar, sem er eitthvað sem getur truflað. Ákvörðun var tekin um að fyrsta skref yrði frekar að laga aðlægar tennur því efri hluti miðframtanna sést ekki í brosinu.

Meðferð:
Meðferð var kláruð í einni heimsókn. Seinna er svo hægt að skipta út krónunum í miðjunni, gera þær líkari hvor annari og raunverulegri.

Viðfangsefni:
Þegar verið er að smíða krónur á miðframtennur þá er gríðalega mikilvægt að þær hafi sömu tannholdslínu því annars vekur það athygli og krónurnar verða áberandi.

Meðferð:
Eins og í þessu tilviki og þess vegna voru krónurnar endurnýjaðar og reynt að skapa raunverulegra útlit. Viðbætur úr tannlituðu fyllingarefni voru settar á augntennur og hliðarframtennur.

Viðfangsefni:
Þegar ein tönn er innar en hinar þá getur fallið skuggi á hana, þá skapar skugginn upplifun af tannlausu bili. Nokkrar leiðir eru til sem laga svona skekkjur.

Meðferð:
Í þessu tilviki var skel úr tannlituðu fyllingarefni bætt framan á og við það varð tönnin sýnilegri.  Einföld og ódýr meðferð.

Viðfangsefni:
Litur og form tanna skiptir miklu máli. Hér er meðfædd tannvöntun, hliðar-framtönn vantar og augntönn er komin í hennar stæði. Mið-framtennur eru dekkri en aðrar tennur í munninum og halla inn á við.

Meðferð:
Viðbót var sett á augntönn til að líkja eftir hliðar-framtönn, skeljar á mið-framtennurnar til að lýsa, laga stöðu og form þeirra. Allt var þetta unnið úr tannlituðu fyllingarefni án þess að taka af eigin tönn.

Viðfangsefni:
Þegar kantar efri góms tanna ná ekki út fyrir tennur neðri góms verður slitið á framtönnum oft verulegt. Í þeirri stöðu er ekki er hægt að bæta neðan á þær. Ef ekkert er gert heldur slitið áfram og tannholdið verður meira áberandi í brosinu.

Meðferð:
Hér var tekið af tannholdinu og efri góms tönnum hliðrað fram fyrir neðri góms tennurnar með skeljum úr tannlituðu fyllingarefni.

Með skeljunum var líka hægt að jafna og lýsa litinn. Áætlaður endingartími er um 4-6 ár. 

Á stofunni eru ekki stundaðar almennar tannréttingar en léttar færslur á einni eða fleiri framtönnum með gómum eða glærum skinnum er meðferð sem við gerum mikið af. 

Viðfangsefni:
Ein skökk framtönn.

Meðferð:
Í þessu tilviki var notaður gómur í 16 vikur og í lok meðferðar voru viðbætur úr tannlituðu fyllingarefni notaðar til að laga slit og jafna kantana. Til viðhalds er stutt við tennurnar með vír sem límdur er aftan á þær og viðheldur nýju stöðunni.

Lítil breyting getur oft gert mikið fyrir brosið.

Viðfangsefni:
Skakkar framtennur.

Meðferð:
Hér voru notaðar glærar skinnur til að minnka skekkjurnar, meðferðin tók 18 vikur. Tennurnar voru lýstar og stærð þeirra jöfnuð með viðbótum. Vír var settur aftan á tennurnar til að viðhalda stöðu þeirra. 

Viðfangsefni:
Mjög algengt er að slit sjáist á mið-framtönnum, þetta eru þær tennur sem eru mest áberandi í munninum. Okkur finnst mjög mikilvægt að auka ekki á eyðingu tanna með því að taka af tönnum sem eru slitnar fyrir og veljum því að bæta á  þær til að varðveita það sem eftir er af tönninni.

Meðferð:
Í þessu tilviki voru viðbætur settar á mið-framtennurnar og reynt var að endurheimta fyrra útlit.   

Viðfangsefni:
Oft er erfitt að eiga við lit á einni dökkri tönn, og eiga þær til að dökkna aftur.

Meðferð:
Hér var tönn lýst með heimalýsingu í 4 vikur. Viðbætur voru settar á tennur og tannholdi var aðlagað. Til að viðhalda þessu útliti þarf að skerpa á lýsingunni og bæta á slitfleti eftir þörfum. 

Viðfangsefni:
Mjög algengt er að slit sjáist á mið-framtönnum. Þetta eru þær tennur sem eru mest áberandi í munninum. Okkur finnst mjög mikilvægt að auka ekki á eyðingu tanna með því að taka af tönnum sem eru slitnar fyrir. Því veljum við að bæta á  þær til að varðveita það sem eftir er af tönninni. 

Meðferð:
Í þessu tilviki voru viðbætur settar á miðframtennurnar og reynt var að endurheimta fyrra útlit.